நான் ஒரு ஆசிரியர். ஆராய்ச்சியாளன். அருண் என்று பலமுறை நீங்கள் கூப்பிட்டால் நான் சிலமுறையாவது திரும்பிப்பார்ப்பேன். அவ்வப்போது புன்னகையும் செய்வேன். மற்றபடி தெருவோரமாக விஞ்ஞானி வேஷ்டி கட்டிக்கொள்ளலாமா என்பது போன்ற உபத்திரவமில்லாத சிந்தனைகளுடன் அரைநிஜார், செருப்பு, செல்போன் அணிந்து நடந்து செல்லும் சென்னைவாசி. ஸ்ரீரங்க விசுவாசி.
அறிவியல் விளக்கங்களை தமிழிலும் எழுத வேண்டும் என்ற ஒரு விபரீத ஆசையில் இந்த வலைதளத்தை சில வருடங்கள் முன் தொடங்கினேன். இதுவரை எழுதியுள்ள அறிவியல் கட்டுரைகளின் பட்டியல் இப்பக்கத்தில் உள்ளது. அவ்வப்போது கர்நாடக இசை விளக்கங்கள், விமர்சனம், அனுபவ பகிர்வுகள், கலை, கதை என்றும் எழுதி வருகிறேன்.
சில இசை மற்றும் அறிவியல் கட்டுரைகள் சொல்வனம் மற்றும் தமிழ்பேப்பர் தளங்களில் வெளிவந்துள்ளது. அம்ருதா மாதாந்திர சஞ்சிகையிலும் ஜனவரி 2012 முதல் வெளிவந்துகொண்டிருக்கிறது. ஓரிரண்டு (பழைய) திண்ணை, (காலாவதியாகிவிட்ட) வெப்புலகம் போன்ற வலைதளங்களிலும் இடம்பெற்றது.
கதைகளில் மெட்ராஸ் பாசி என் முதல் சிறுகதை. ஒரு கொளை கதை முதல் குறுநாவல் (முடிந்துவிட்டது). சமீபத்தில் எழுதியது எட்டணாவிற்கு உலக ஞானம் (சொல்வனம்).
பள்ளியில் தமிழ் ஆசிரியர்களுக்கு என்மேல் மிகுந்த நம்பிக்கை. சுட்டு போட்டாலும் இவனுக்கு தமிழ் வராது என்பதால் தமிழ்தாய் இவனிடமிருந்து பிழைத்தாள் என்று. ஆனாலும் கலியுகமல்லவா… என் தமிழ் ஆசிரியர்கள் என்னை மன்னிப்பார்களாக.
*****
இத்தளத்தின் உள்ளடக்கத்தை பற்றிய உங்களது கருத்துகளை இப்படிவத்தின் வழி தெரிவிக்கவும். சற்று தாமதமானாலும் அனைத்திற்கும் பதில் கிடைக்கும். உரியவை பதிலுரைகளுடன் பதிவுகளில் இடம்பெறும்.
தளத்தில் இருக்கும் எழுத்து அனைத்தும் என்னால் மட்டுமே பதிப்புரிமைபடுத்தப்பட்டுள்ளவை. என் அனுமதியின்றி காசுக்கு விற்கவோ, காப்பி அடிக்கவோ உரிமையில்லை.
மேலும், இங்கு எழுதியுள்ள என் சொந்த கருத்துகளுக்கு என் வேலை நிறுவனம் பொறுப்பேற்பதாக பொருள் விளக்கம் எடுத்துக்கொள்ள இயலாது. என் கருத்துகள் எத்துணை பகுத்தறிவுள்ளதாகவும், சாதுர்யமானதாக இருப்பினும்.